Impamvu 10 zituma Umunara wa Eiffel ukundwa ku isi, ugasurwa na miliyoni zisaga 6.7 buri mwaka.

Umunara wa Eiffel ni inyubako yihariye iri mu murwa mukuru w’u Bufaransa, Paris. Wubatswe mu rwego rwo kwizihiza imurikagurisha mpuzamahanga ryabaye mu 1889, ryari rifitanye isano n’isabukuru y’imyaka 100 ya Revolisiyo y’u Bufaransa.

Mu myaka isaga ijana umaze uhagaze, uyu munara wabaye kimwe mu bimenyetso biranga Paris n’u Bufaransa muri rusange. Ukurura ba mukerarugendo baturuka mu bihugu bitandukanye, bitewe n’amateka yawo, ubwiza bw’imiterere yawo n’ibikorwa bitandukanye bishobora gukorerwa mu bawusuye.

Raporo y’ikigo SETE, gicunga Umunara wa Eiffel, igaragaza ko mu 2025 abantu bagera kuri miliyoni 6.75 binjiye mu bice by’uyu munara bisurwa. Ibi byerekana uburyo ukomeje gukurura abashyitsi baturutse hirya no hino ku isi.

Dore impamvu 10 zituma Umunara wa Eiffel ukomeza gukundwa no gusurwa n’abantu benshi.

1. Ni ikimenyetso gikomeye kiranga Paris

Iyo havuzwe Paris, Umunara wa Eiffel ni imwe mu nyubako zihita ziza mu bitekerezo by’abantu benshi. Ishusho yawo ikoreshwa mu matangazo y’ubukerarugendo, amafoto, filime n’ibindi bikorwa byerekana umuco w’u Bufaransa.

2. Ufite amateka akomeye

Uyu munara wubatswe hagati ya 1887 na 1889, ugamije kuba igihangano cy’ubwubatsi cyagaragaza iterambere ry’ubumenyi n’ubuhanga mu gihe cy’imurikagurisha mpuzamahanga rya Paris. Kuba umaze imyaka isaga 130 uhagaze bituma uba ahantu h’ingenzi ku bakunda amateka.

3. Utanga ishusho yihariye y’umujyi wa Paris

Abawusura bashobora kurebera hejuru inyubako, imihanda n’ahantu nyaburanga hatandukanye ho muri Paris. Uko umujyi ugaragara uri hejuru bituma abantu benshi bahitamo kuwusura kugira ngo bibonere ayo mashusho imbonankubone.

4. Ufite imiterere y’ubwubatsi idasanzwe

Umunara wa Eiffel wubatswe hifashishijwe ibyuma byinshi byahujwe mu buryo bw’ubuhanga. Imiterere yawo n’uburyo ibice byawo bishyigikirana bituma ukomeza kuba urugero rukomeye rw’ubwubatsi bwagezweho mu mpera z’ikinyejana cya 19.

5. Ushobora gusurwa ku manywa no nijoro

Ku manywa, abashyitsi babona neza imiterere y’uyu munara n’umujyi uwukikije. Nijoro na bwo, amatara awumurikira awuha isura itandukanye, bigatuma uba ahantu hakurura abafotora n’abashaka kwishimira ubwiza bwa Paris mu masaha y’umugoroba.

6. Ni ahantu hakundwa gufotorera no gufatira amashusho

Abakerarugendo benshi bafata amafoto n’amashusho y’urwibutso hafi y’uyu munara. Ishusho yawo iramenyekana ku rwego mpuzamahanga, ku buryo kuyifotora bifatwa na benshi nk’igice cy’ingenzi cy’urugendo bagiriye i Paris.

7. Harimo ibikorwa bitandukanye byo kwidagadura

Gusura uyu munara ntibigarukira ku kureba inyubako gusa. Abashyitsi bashobora kuzamuka mu byiciro bitandukanye byawo, gusura ahantu hagenewe kurebera umujyi no kumenya byinshi ku mateka yawo.

8. Ufite amahitamo y’aho gufatira amafunguro

Mu munara wa Eiffel harimo resitora zitandukanye, zirimo Madame Brasserie na Le Jules Verne. Abashyitsi bashobora gufatira amafunguro bareba ibice bitandukanye bya Paris, bigatuma urugendo rwabo ruhuza ubukerarugendo n’ubunararibonye bwo gusangirira ahantu hihariye.

9. Ni igihangano cy’ubuhanga n’ikoranabuhanga

Mu gihe wubakwaga, Umunara wa Eiffel wari umushinga udasanzwe kubera uburebure n’ubwinshi bw’ibyuma byawugize. Wakozwe hifashishijwe ibice by’ibyuma bigera ku 18.038 n’imisumari yihariye ihuza ibyuma igera kuri miliyoni 2.5. Ibi bigaragaza ubuhanga bwakoreshejwe mu kuwubaka.

10. Ni ahantu hafite agaciro ku bukerarugendo bw’u Bufaransa

Umunara wa Eiffel ukomeza gufasha gukurura abashyitsi baturuka hirya no hino ku isi. Abawusura bagira uruhare mu bukungu binyuze mu kwishyura amatike, gucumbika muri hoteli, gukoresha resitora, kugura ibintu by’urwibutso no gukoresha izindi serivisi z’ubukerarugendo.

Umunara wa Eiffel ni inyubako yihariye iri mu murwa mukuru w’u Bufaransa, Paris.

Abakerarugendo benshi bafata amafoto n’amashusho y’urwibutso hafi y’uyu munara wa Eiffel.