Cristiano yasezeye mu ikipe y'igihugu ya Portugal nyuma y'imyaka 23, asiga amateka adasanzwe

Uyu mukinnyi w'imyaka 41 yabitangaje kuri uyu wa Kane tariki ya 5 Ugushyingo 2026, abinyujije mu butumwa bwa videwo yashyize ku mbuga nkoranyambaga, aho yavuze ko igihe kigeze ngo asubize nimero 7 y'ikipe y'igihugu ab'igihe kizaza.

Ronaldo yatangiye gukinira Portugal muri Kanama 2003, ubwo yari afite imyaka 18 gusa. Mu myaka 23 yamaze ayikinira, yayikiniye imikino 234 atsinda ibitego 146, aba umukinnyi ufite imikino myinshi n'ibitego byinshi mu mateka y'umupira w'amaguru w'ikipe z'ibihugu mu bagabo ku isi. Mu butumwa bwe bwo gusezera, Ronaldo yavuze ko atigeze yumva ko nimero 7 yari iye wenyine, ahubwo ko yari afite inshingano zo kuyambara, kuyirwanirirra no kuyihesha ishema mu bibuga bitandukanye ku isi mu gihe cy'imyaka 23.

Yagize ati: “Uyu munsi igihe kirageze ngo nyishyikirize ab'igihe kizaza. Si icyemezo cyoroshye, kuko hari ibyemezo bidafatwa n'ubwenge gusa, ahubwo bifatwa n'umutima.”

Ibikombe Ronaldo yegukanye muri Portugal

Mu byo Cristiano Ronaldo azahora yibukirwaho harimo gufasha Portugal kwegukana igikombe cya EURO 2016, cyari icya mbere gikomeye iki gihugu cyegukanye ku rwego rw'ikipe z'ibihugu. Yafashije kandi Portugal kwegukana UEFA Nations League mu 2019 no mu 2025, ibikombe byamwongereye umwanya mu mateka y'iyi kipe. Ronaldo kandi ni we mukinnyi wa mbere mu mateka watsinze ibitego mu marushanwa atandatu y'Igikombe cy'Isi, kuva mu 2006 kugeza mu 2026. Nubwo asezeye gukinira ikipe y'igihugu, Cristiano Ronaldo ntabwo asezeye mu mupira w'amaguru muri rusange. Azakomeza gukina ku rwego rw'amakipe, aho abarizwa muri Al Nassr yo muri Saudi Arabia. Icyemezo cye gisobanuye ko Portugal igiye gutangira urugendo rushya idafite kapiteni wayo umaze imyaka myinshi ayihagarariye mu marushanwa akomeye ku isi. ku myaka 41, Ronaldo asize amateka arimo ibitego 146 mu mikino 234, ibikombe bitatu bikomeye hamwe n'urugendo rw'imyaka 23 ruzakomeza kwibukwa n'abakunzi ba ruhago ku isi. Portugal izakomeza gukina, ariko nimero 7 yari imenyerewe kuri Cristiano Ronaldo izahora ifite umwanya wihariye mu mateka y'iki gihugu.