Maresca ashyigikiye Donnarumma, avuga ko azisubiraho Umutoza Enzo Maresca yatangaje ko nta mpungenge afite ku munyezamu Gianluigi Donnarumma, nyuma y'amakosa aherutse gukora mu mikino ya Manchester City. Mu mukino wa UEFA Champions League wahuje Manchester City na RB Leipzig ku wa Gatatu, Donnarumma yagize uruhare mu gitego kimwe City yatsinzwe, ubwo Ridle Baku yamutsindaga umupira mu ruhande yari ahagazeho. N'ubwo City yatsinze uwo mukino ibitego 3-2, iri kosa ryongeye gutuma imikinire ye ivugwaho byinshi.
Kugeza ubu, muri iyi shampiyona mu marushanwa yose, Donnarumma amaze gukora amakosa atatu yavuyemo ibitego. Rimwe muri ayo makosa ryabaye mu mukino City yatsinzwemo na Aston Villa, bituma itsindwa bwa mbere muri Premier League.
Maresca yakomeje kugaragaza ko yizeye Donnarumma.
Nubwo Manchester City imaze gutsindwa imikino ibiri ya shampiyona yikurikiranya, ikava ku mwanya wa mbere ikajya ku wa kabiri inyuma ya Arsenal, Maresca yakomeje kugaragaza ko yizeye Donnarumma.
Mu kiganiro n’abanyamakuru, Maresca yagize ati: "Ntabwo ari ikibazo kimpangayikishije, ariko ni ikosa. Turabizi kandi na we arabizi. Ubu icyo tugomba gukora ni ukwibanda ku mukino dufitanye na Nottingham Forest." Yakomeje avuga ko adatekereza guhindura umunyezamu cyangwa gusuzuma icyo kibazo mu kiruhuko cy'imikino y'amakipe y'ibihugu.
Maresca yanavuze ko abantu badakwiye kwibanda ku
ikosa rimwe gusa, kuko mbere yaryo Donnarumma yari yakoze uburyo bwiza bwo
gukuramo umupira, ku buryo atari buri munyezamu wese washoboraga kubikora.
Yasoje agaragaza icyizere afitiye uyu munyezamu,
avuga ko azi neza ko yakoze ikosa ku gitego cya mbere, ariko ko azakosora kandi
akagaruka ku rwego rwe rusanzwe.
Manchester City ubu iritegura urugendo ruyerekeza kuri Nottingham Forest, aho izaba ishaka kwisubiza amanota nyuma yo gutsindwa imikino ibiri ya Premier League yikurikiranya.
Leave a Comment