Indirimbo "Dai Dai (FIFA World Cup Official Song 2026)" yahuriyemo abahanzi Shakira na Burna Boy ikomeje gukora amateka ku rwego mpuzamahanga. Iyi ndirimbo yinjiye ku rutonde rwa Billboard Hot 100, kimwe mu bipimo bikomeye bipima indirimbo zikunzwe muri Leta Zunze Ubumwe za Amerika.

Iyi ntsinzi yatumye "Dai Dai" iba imwe mu ndirimbo z'Igikombe cy'Isi zageze kuri uru rutonde, ibintu bishimangira uburyo yakiriwe neza n'abakunzi b'umuziki hirya no hino ku Isi. Uretse Hot 100, iyi ndirimbo yanaje ku mwanya wa mbere ku rutonde rwa Billboard Global Excl. U.S., ikomeza kwigarurira imitima y'abakunzi b'umuziki ku rwego mpuzamahanga.

Shakira, usanzwe uzwiho gukora indirimbo z'amarushanwa y'Igikombe cy'Isi, yongeye kwandika amateka afatanyije na Burna Boy, aho "Dai Dai" ikomeje gukinwa cyane ku maradiyo, ku mbuga zicururizwaho umuziki no ku mbuga nkoranyambaga, ikaba imwe mu ndirimbo zikomeje kuvugisha benshi muri uyu mwaka.