U Rwanda na Mali birimo gushaka uburyo bwo kurushaho kunoza umubano wabyo no kwagura ubufatanye mu nzego zitandukanye, by’umwihariko mu bijyanye n’amahoro n’umutekano.
Ibi byagarutsweho mu biganiro byahuje Minisitiri w’Ububanyi n’Amahanga w’u Rwanda, Amb. Olivier Nduhungirehe, na mugenzi we wa Mali, Abdoulaye Diop, byabereye i Bamako, umurwa mukuru wa Mali, mu ruzinduko rw’akazi rw’uhagarariye u Rwanda.
Mu biganiro byabo, impande zombi zarebeye hamwe uburyo bwo gushimangira imikoranire mu rwego rwa dipolomasi, gukomeza ubufatanye mu nzego mpuzamahanga no gushakira hamwe ibisubizo ibibazo by’amahoro n’umutekano byugarije ibihugu byombi ndetse n’akarere biherereyemo.
Muri urwo ruzinduko, Minisitiri Nduhungirehe yanahuye na Lt. Gen. Ismaël Wagué, ushinzwe Ubumwe n’Ubwiyunge muri Mali, baganira ku bunararibonye n’ingamba zafasha kwimakaza ubumwe n’ubwiyunge mu baturage.
U Rwanda rufite ubunararibonye mu kubaka ubumwe n’ubwiyunge nyuma ya Jenoside yakorewe Abatutsi mu 1994, mu gihe Mali na yo ikomeje gushaka ibisubizo birambye ku bibazo by’umutekano muke n’amakimbirane.
Ubufatanye hagati y’ibi bihugu bushobora kugira uruhare mu guhanahana ubumenyi, gushimangira umubano wa dipolomasi no guteza imbere ingamba zihuriweho zigamije amahoro n’ituze rirambye.
Minisitiri Nduhungirehe yagiranye ibiganiro na Lt. Gen. Ismaël Wagué, ushinzwe Ubumwe n’Ubwiyunge muri Mali.
SOURCE: IGIHE
Leave a Comment