UMWANA WAWE ANYARA KU BURIRI N'UBWO YAKUZE? Dore Uko Wamufasha Kubicikaho Utamuhangayikishije!

UMWANA WAWE ANYARA KU BURIRI N'UBWO YAKUZE? Dore Uko Wamufasha Kubicikaho Utamuhangayikishije!

Ese umwana wawe ahora anyara ku buriri nijoro, ukaba waragerageje kumuhana, kumucyaha no kumubuza kunywa amazi mbere yo kuryama ariko bikanga? Mbere yo kumurakarira, menya ko kunyara ku buriri akenshi atari ibintu umwana akora ku bushake. Hari uburyo ushobora kumufasha kubicikaho, utamukoza isoni cyangwa ngo umuhe ibihano. Kunyara ku buriri igihe umwana asinziriye ni ikibazo gihangayikisha abana ubwabo ndetse n'ababyeyi ubwabo. Gusa ni byiza kumenya ko atari ikintu kidasanzwe, cyane cyane ku bana bakiri bato, kandi ko hari igihe kibonerwa umuti uko umwana agenda akura.

Kuki umwana ashobora gukomeza kunyara ku buriri nijoro?

Abana benshi bari munsi y'imyaka itanu cyangwa itandatu bashobora kunyara ku buriri nijoro, nubwo ku manywa baba bashobora kwigenzurira inkari neza.

Hari n'abana bakomeza kugira iki kibazo bakageze ku myaka umunani, icumi cyangwa 11. Ibi ntibivuze ko baba babikora ku bushake. Akenshi biba biterwa n'uko ubwonko n'uruhago rw'inkari bitaragera ku rwego rwo kumufasha gukanguka igihe uruhago rwuzuye.

Ubushakashatsi bwerekana kandi ko abahungu bakunda gutinda gucika kuri iki kibazo ugereranyije n'abakobwa.

Ni ibihe bintu bishobora gutuma umwana anyara ku buriri?

Mu gihe umwana akomeje kunyara ku buriri, cyane cyane iyo amaze gukura, ni ngombwa kureba niba nta kindi kibazo kibitera.

Bimwe mu bishobora kugira uruhare muri iki kibazo ni:

Diyabete.

Kuribwa mu nda bikabije (constipation).

Umunaniro n'imihangayiko.

Ibibazo bijyanye n'imikorere y'uruhago rw'inkari.

Gusinzira cyane ku buryo atumva igihe uruhago rwuzuye.

Ni yo mpamvu umwana ugejeje ku myaka irindwi agakomeza kunyara ku buriri aba akeneye gusuzumwa n'umuganga, cyane cyane iyo iki kibazo kigarutse nyuma y'igihe yari amaze atakinyara ku buriri .

Dore uburyo 7 wafashamo umwana kureka kunyara ku buriri

1. Irinde kumucyaha cyangwa kumukoza isoni

Ababyeyi bamwe batekereza ko guhana umwana cyangwa kumusebya igihe yanyaye ku buriri bizatuma areka iyo ngeso. Nyamara bishobora kumwongerera ubwoba, ipfunwe n'imihangayiko, bikarushaho kumugiraho ingaruka.

Jya umwereka ko umwumva kandi ko kunyara ku buriri atari icyaha yakoze.

2. Mujyane kunyara mbere yo kuryama

Shishikariza umwana kujya kunyara mbere yo kuryama kugira ngo uruhago rwe rube rurimo inkari nke igihe agiye gusinzira.

Nubwo kumubyutsa nijoro akajya kunyara bishobora kugabanya impanuka zo kunyara ku buriri muri iryo joro, ntibivura burundu ikibazo.

3. Mugabanyirize ibinyobwa mu masaha yegereje kuryama

Ni byiza gutuma umwana anywa amazi ahagije ku manywa, ariko ukagabanya ibinyobwa byinshi mu masaha yegereje kuryama.

Ibi ntibisobanuye kumwima amazi igihe ayakeneye, ahubwo ni ugutegura neza igihe ayanyweramo.

4. Mujye mumushimira ku ntambwe atera

Igihe umwana amaze ijoro atanyaye ku buriri, mushimire. Ushobora no kumukorera utuntu tumushimisha kugira ngo arusheho kugira ubushake bwo gukomeza kwigenzura.

Icyakora, irinde kumutera kumva ko yananiwe igihe yanyaye ku buriri. Ashobora kuba atabasha kubyigenzurira.

5. Mugirire isuku kandi mumurinde gukonja

Niba umwana yanyaye ku buriri, mufashe guhindura imyenda no gusukura aho yaryamye utamukoza isoni.

Ushobora no gukoresha ibikoresho birinda matela kwinjirwamo n'inkari. Ku bana bakiri bato, impapuro zabugenewe (pampers) zishobora kubafasha kutabangamirwa n'inkari mu gihe basinziriye.

6. Mujyane kwa muganga igihe ikibazo gikomeje

Niba umwana arengeje imyaka irindwi agakomeza kunyara ku buriri, ni byiza kugana abaganga kugira ngo barebe niba nta kibazo cy'ubuzima kibitera.

Nanone, niba umwana yari amaze igihe kinini atanyara ku buriri ariko akongera kubitangira, cyangwa akaba afite inyota idasanzwe, kunyara cyane ku manywa, kubabara igihe yihagarika cyangwa ibindi bimenyetso bidasanzwe, agomba gusuzumwa.

7. Mwitondere imiti n'ubundi buryo muvuga ko buvura iki kibazo

Hari imiti ishobora kugabanya cyangwa guhagarika kunyara ku buriri mu gihe umwana ayikoresha. Ariko si ko buri muti wose uvura burundu iki kibazo, kandi hari igihe umwana ashobora kongera kunyara ku buriri nyuma yo kuwuhagarika.

Bityo, ntukagurire umwana imiti utabanje kugisha inama muganga.

Hari uburyo gakondo  bushobora gufasha abana gucika kuri iki kibazo. Muri bwo harimo:

Amavuta ya elayo y’akazuyazi : Shyushya amavuta ya elayo namara kuba kauzuyazi ayasige ku kiziba cy’inda usa naho uri gukorera umwana masaje. Jya ubikora rimwe ku munsi cyane cyane mbere yo kuryama.

Ubuki : jya uha umwana ikiyiko cy’ubuki bwiza buri munsi cyangwa se ubuvange mu byo anywa aho gushyiramo isukari isanzwe.

Apple cider vinegar : Ubu bwoko bwa vinaigre, ufata akavinaigre kuzuye ikiyiko ugashyira mu kirahure cy’amazi ukabiha umwana byibura gatatu ku munsi. Ayo mazi yo mu kirahure kimwe niyo anywaho gatatu.

Imineke : Genera umwana wawe imineke byibura ibiri cyangwa se itatu buri munsi bizamufasha

Icyo ababyeyi badakwiye kwibagirwa

Kunyara ku buriri si ikosa umwana aba yakoze, kandi ntibikwiye kumutera ipfunwe. Ku bana bakiri bato, akenshi iki kibazo kigenda kigabanuka uko bakura.

Icy'ingenzi ni ukumuha ubufasha, kumutera umwete, kumurinda gusebywa no gushaka ubufasha bw'abaganga igihe bikenewe.

Wibuke ko umwana wawe adakeneye guhanwa kugira ngo areke kunyara ku buriri; akeneye kwitabwaho, kwihangana no gufashwa mu buryo bukwiye.


Leave a Comment

LIVE STREAM

Morning Energy - 88.8 FM