Bayern Munich izahurira na Ajax muri Kenya mu mukino wo gutaha sitade nshya

Nk’uko urubuga rwa Bundesliga rwabitangaje ku wa 29 Ukwakira 2026, Bayern Munich, imwe mu makipe akomeye kandi yatwaye ibikombe byinshi bya shampiyona y’u Budage, izasura Kenya ku nshuro ya mbere mu mateka yayo. Uyu mukino uzabera kuri Stade Mpuzamahanga ya Raila Odinga, izwi kandi nka Talanta Stadium, yubatswe mu murwa mukuru Nairobi mu rwego rwo kwitegura Igikombe cya Afurika cy’ibihugu cya 2027 (AFCON).

Kenya izakira iri rushanwa ifatanyije na Tanzania na Uganda. Ni ubwa mbere mu mateka AFCON izaba yakiriwe n’ibihugu bitatu, ndetse ni ubwa mbere kuva mu 1976 izaba ibereye muri Afurika y’Iburasirazuba.

Bayern na Ajax, amakipe afite amateka akomeye i Burayi

Uyu mukino uzahuza amakipe abiri afite amateka akomeye mu mupira w’amaguru w’i Burayi. Bayern Munich na Ajax Amsterdam hamwe amaze kwegukana ibikombe 10 bya European Cup na UEFA Champions League. Aya makipe aheruka guhura mu Kuboza 2018, mu mikino y’amatsinda ya UEFA Champions League, aho yanganyije ibitego 3-3 mu mukino wari urimo ishyaka rikomeye. Muri uwo mukino, ibitego bine byabonetse mu minota 10 ya nyuma.

Mu mikino 10 y’amarushanwa yemewe aya makipe amaze guhuriramo, buri imwe yatsinze imikino itatu, mu gihe ine yarangiye anganyije. Imikino itatu ya nyuma yahuje aya makipe yose yarangiye anganyije.

Harry Kane azaba ari mu bakinnyi bazagaragara muri Kenya

Umukinnyi w’Umunya-England Harry Kane, ukinira Bayern Munich, na we azaba ari mu bakinnyi biteganyijwe ko bazagaragara muri uyu mukino. Azaba ahagarariye ikipe yatwaye igikombe cya shampiyona y’u Budage, Bundesliga. Bayern Munich yari yarakinnye muri Afurika mu mwaka wa 2013, ubwo yitabiraga FIFA Club World Cup yabereye muri Maroc. Icyo gihe yatsinze Guangzhou Evergrande ibitego 3-0, nyuma itsinda Raja Casablanca ibitego 2-0 ku mukino wa nyuma, yegukana igikombe

Yongeye guhura n’ikipe yo muri Afurika mu 2021, ubwo yatsindaga Al Ahly yo mu Misiri mu mukino wa ½ cya FIFA Club World Cup yari yabereye muri Qatar, ibifashijwemo n’ibitego bibiri bya Robert Lewandowski. Amatike yo kureba umukino uzahuza Bayern Munich na Ajax azatangira kugurishwa ku wa 5 Ugushyingo 2026, binyuze ku rubuga rwa talantasportscity.com. Uyu mukino utegerejweho gukurura abafana benshi b’umupira w’amaguru muri Kenya no mu karere ka Afurika y’Iburasirazuba, mu gihe ibihugu byo muri aka karere bikomeje imyiteguro yo kwakira AFCON 2027.