Mu itangazo ryashyizwe ahagaragara, ubuyobozi bwa Rayon Sports bwasabye abanyamakuru n’ibitangazamakuru muri rusange kwirinda imvugo zibasira abakinnyi ku giti cyabo, no kwirinda gukwirakwiza amakuru atari yo cyangwa atagenzuwe yerekeye ubuzima bw’ikipe n’abafatanyabikorwa bayo.
Ubuyobozi bwagaragaje ko imyitwarire nk’iyo ishobora kwangiza isura y’ikipe, icyizere ifitiwe, ndetse n’umubano wayo n’abafatanyabikorwa n’abakunzi bayo.
Rayon Sports yamenyesheje abanyamakuru n’ibitangazamakuru byifuza gutangaza amakuru yayo ko imiryango ifunguye kuri buri wese wifuza kumenya amakuru y’ukuri kandi yizewe, binyuze mu nzira zemewe z’itumanaho.
Ikipe yasabye kandi abanyamakuru kurangwa n’ubunyamwuga mu gushaka no gutangaza amakuru yayo, hagamijwe kubaka umupira w’amaguru mu buryo bwa kinyamwuga. Rayon Sports yagaragaje ko ishima uruhare itangazamakuru rigira mu iterambere ry’umupira w’amaguru mu Rwanda. Ubuyobozi bwarangije busaba ko ubufatanye n’itangazamakuru bukomeza.
Ifoto igaragaza itangazo rya Rayon Sports.
Leave a Comment